مش متعود دايما اظهر مشاعرى على الفيس 
بس لغايه دلوقتى وانا بكتب السطور دى وانا بابكى !!!
مكنتش قادر اتكلم
غالبا من الصدمه الى لسه مفوقتش منها لما عرفت الخبر فجر يوم استشهاده ونمت وافتكرته حلم!!؟

اول مره اشوف ابونا الشهيد ابيفانيوس كنا فى شم نسيم2011
كنا متجمعين فى الدير (كنت طالب رهبنه ساعتها) وابونا اثناسيوس بيدير مناقشه لاهوتيه
سال سؤال صعب جدا محدش عرف يجاوبه …كان قاعد جنبى فى اخر الدايره ابونا ابيفانيوس قرب من ودنى وجاوب على السؤال بضحكه ليا عمرى مهنساها…بقوله يابونا مقولتش ليه الاجابه…قالى مهو كدا كدا هتتقال …

فى مره تعبت فى زورى جامد من لسعه البرد ف كل يوم نزول التسبحه…روحت لابونا ابيفانيوس لانه طبيب(كان مسؤل وقتها عن المكتبه الاثريه) لما شافنى قالى لازم تنزل تكشف ف مصر …قلتله لا دى بسيطه جدا…قالى مفيش حاجه اسمها بسيطه…صحتك وزنه من الله…انزل بسرعه!!!

كنا فى يوم فى قداس المجمع(قداس يوم الاحد) واحنا خارجين من الكنيسه ملقاش الشبشب بتاعه …من غير شوشره و دوشه راح مشى لغايه المائده على رجليه…

لما كنا بنوزع الاكل على المايده كان دايما يبصلى أنى محطلوش اكل كتير….كنت اوقات بهزر معاه وكانى هحطله اكتر …كان يبصلى بصه بابتسامه عمرى برضو مهنساها

يوم رسامته اسقف كنا فى الكنيسه وبعد الانتهاء من الاحتفال جمع الرهبان والاخوه وقالنا بالحرف الواحد
انا مش سيدنا ولا انبا…انا زى مانا ابونا ابيفانيوس انا مش بحب كدا انا واحد زيكم انا منكم وكلنا من المسيح ..!
لو سمحتم مفيش حد يعمل ميطانيه… مفيش حد يبوس ايدى…السلام عادى…مفيش حد يقول الالحان بتاعت الاسقف دى…

تانى يوم وفى صلاه الغروب اول لما دخل قلنا لحن اك اسماروؤت…فضل واقف واول لما اللحن انتهى …انفعل بجد بس بهدوء وقال ” يا ابهات من فضلكم من فضلكم من فضلكم ريحونى”
عمرى ماشفته بعصايه ولا بعمه(غير فى المناسبات) 
كان متضع اتضاع حقيقى مش اتضاع مزيف امتلأت منه كنائسنا

فى مره كنت فى المكتبه الاثريه واتكلمنا حبه عن التعاليم الغريبه الى دخلت الكنيسه وافسدت عقول الشعب المسيحى وبعدنا عن تعليم الاباء وصار لنا مسيح اخر زى ما قال بولس الرسول ومش بنمشى ورا المسيح الحقيقى 
بقوله يابونا المسيح الى بيدوا للناس مسيح ناقص مسيح بقى مشوهاً بتعاليمهم الجديده 
قالى باللفظ( ده ف مره بننقاش حاجه فى المجمع محدش عرف يجاوب وفى ناس قالت حاجات غريبه كانها فتاوى…)
بقوله طيب ومتكلمتش ليه…قالى لا هنا انا اتكلمت لما ملقتش حد اتكلم …ده شعب المسيح ودى امانه التعليم

حتى لما سيبت الدير قالى انت كدا احسنلك…انت لازم تكون حر !!!

وقت لما كنت مسافر ايطاليا اهتم جدا بالموضوع وكتبلى جواب فى نفس اليوم الى عرف فيه ونصحنى أنى اهتم بالدراسه لاناره الناس لان دى وصيه المسيح لينا

لما سافرت ايطاليا…وفى يوم 27-6-2017 رحت دير خلوه بدير Bose بشمال ايطاليا
اول انا عرفوا أنى من مصر سالونى ….انت تعرف حد اسمه انبا ابيفانيوس!!!!! كنت عايز اقولهم ده مش معروف عندنا وفى ناس بتحاربه وتهرطقه عشان تعاليمه النورانيه…
ولقيت معلقين حاجه ليه فى البوم ذكريات الدير ده..

وانا برا مصر بعتلى يطمن عليا كذا مره.

ودائما يقولى ويفكرنى انت مقارى انت من ولاد الدير وابو مقار.

اخر مره شوفته لما رحت الدير يوم من الاسبوع اجازه الى نزلته مصر ….ملقتهوش فى الدير وكان قافل موبايله وانا خلاص على البوابات وماشى شوفته كان ركب جنب راهب فى عربيه نص نقل…شاور للراهب الى سايق انه يوقف العربيه جريت وسلمت عليه …مكنتش اعرف اننا بنودع بعض.!

انا مش هعرف اتكلم عنك انا اتكلمت عن مواقف انا شفتها معاك

خسرت الكنيسه القبطيه رجلا فى استنارته وعلمه واتضاعه الحقيقى وهروبه من مجد العالم وحماسه لتغيير الكنيسه…لن ياتى كثيرا فى زماننا الردئ هذا
نصلى بدموع لاجل انبا تواضروس أن يعطيه حكمه وان يعزل الخبثاء لكى يكون سلاما وبنياناً حقيقياً للكنيسه…

اعاهدك ياابى

نعم نفرح بوصولك الى حبيبك يسوع المسيح
وان كنت اتمنى واصلى بدموع أن تكون حادثه جنائيه عاديه
ولكن نعاهدك اننا لن نسكت عن اكتشاف الحقيقيه وليس القاتل فقط ولكن المحرضين على القتل!!!!!!!!!!!!!!!
لن نسكت عن كل فساد وفاسد يتهرب داخل عبائه داخل الكنيسه وليس أن شوهونا وحرمونا حرمان زائل يقربنا اكثر من يسوع الحق…ولكن أن قدموا رؤوسنا على طبق مثل المعمدان..

Close Menu
Secured By miniOrange